2022ko otsailean, Athletic Club Fundazioak Onintza Enbeitaren “Gogoaren indarra” eleberria argitaratuko du. “Aukeratu zeure abentura” liburu klasikoen formatuan idatzitako eleberria da, eta irakurleak protagonistari laguntzeko erabakiak hartu beharko ditu. Hamaika eta hamahiru urte bitarteko haurrek irakurtzeko pentsatua, liburua doan banatuko da ikastetxeetan eta kirol-klubetan.

Laiatzen ametsa San Mamesen jokatzea da. Ordea, ez du bide erraza izango. Askotan, aukeratu egin beharko du futbolaren eta bizitzako zenbait gauzaren artean. Benetan garrantzitsuak diren gauzak zeintzuk diren jakiten lagunduko dio egin beharreko bideak Laiatzi, eta bere ametsa puntaren puntara helduko ez balitz ere, bizitzak aukera zoragarriak ematen dituela ikasiko du. Hori bai, bere esku dagoen guztia egingo du bere ametsa lortzeko.

Onintza Enbeita Maguregi (Muxika, 1979): kazetaritzan lizentziatua, baina umetatik bertso giroan hezia. Euskaldunon Egunkarian hasi zen idatzizko kazetaritza lantzen, eta harrezkero, Berrian, Garan, Argian, Aizun, Fridan, Ttapen eta beste hainbat publikaziotan argitaratu izan ditu bere artikuluak. 2018An, Lankuk argitaratutako Buruz-Buru proiektuan parte hartu zuen. Hau da fikzioa idatzi eta publikatzera ausartu den lehen aldia.